EP1 我哋兩句話畫咗幅識㩒嘅人體呼吸系統圖（未睇？去睇返 EP1 完整教學）。
今集升呢。心法一句講晒：唔啱心水唔使重新開過，好教材係一層一層「加」上去嘅。落多一句咒語——「接續上一個圖，在原有基礎上加，不要推倒重來」——幅死圖即刻識呼吸。
🧰 今次用咩工具
同 EP1 一樣：Gemini（Canvas），免費版，喺 EP1 嗰個對話度直接傾落去就得。⏱ 一句 prompt、30 秒搞掂。
Step 1：唔好開新對話——回到 EP1 嗰個 Canvas
開返 EP1 生成幅圖嗰個對話，喺同一個 Canvas 度傾落去。
Step 2：一句 Prompt，令幅圖識呼吸
成句照抄，一隻字唔使改：
（接續上一個呼吸系統圖，在原有基礎上加入呼吸動畫，不要推倒重來。）加入氣流動畫：可循環播放嘅呼吸過程——‧ 吸氣：橫膈膜下降變平、胸腔擴張，空氣粒子由 鼻腔→氣管→支氣管→肺泡 流入；‧ 呼氣：橫膈膜上升復原、胸腔收縮，空氣由肺泡反方向流出。用動態粒子或箭咀表示氣流方向（吸氣藍綠、呼氣暖色）。加一個「呼吸」播放／暫停掣，並可調吸氣／呼氣速度。橫膈膜運作方向必須正確（吸氣下降、呼氣上升）。
等 10–20 秒——幅圖郁咗：橫膈膜一下一下升降，藍綠色粒子由鼻腔一路流入肺泡，跟住暖色粒子反方向流返出嚟。
Step 3：拆解——點解呢句要咁長？
條 prompt 每一舊都有用，抄之餘要識點解，先改得到自己嗰版：
➊ 「不要推倒重來」＝保住 EP1 幅準確嘅圖，唔使重畫重核。
➋ 寫吸氣同呼氣兩個方向＝逼 AI 講清楚流程，唔會得個「郁」字。
➌ 指定顏色（吸氣藍綠、呼氣暖色）＝學生一眼分到入定出，唔使你旁述。
➍ 「橫膈膜運作方向必須正確（吸氣下降、呼氣上升）」＝呢句係重點。唔落，AI 好易畫成吸氣時橫膈膜向上——整個相反，教錯咗。
➎ 「播放／暫停掣＋可調速度」＝呢個掣先係堂上最好用嗰件嘢，睇下一段。
【延伸教學】最好用嘅唔係動畫，係個「慢速」掣 🐢
生成完，撳個播放掣，然後將速度拉到最慢：橫膈膜點樣由拱形變平、胸腔點樣同步擴張——慢鏡逐格睇，學生自己睇得出「吸氣＝橫膈膜下降」。以前口講十分鐘嘅嘢，慢播一次就明晒。
想再加嘢，逐句貼落去：
加入「吸氣／呼氣」文字提示，隨動畫階段即時切換顯示。
在動畫旁顯示簡單的胸腔容積與氣壓變化提示（容積增大、氣壓下降時空氣流入）。
🔧 修錯心法：形容個問題就得
生成有嘢唔啱好正常，唔使重新開始：
記住分工：你負責講「想點」，佢負責諗「點做」。
🎲 進階課堂玩法
投影出嚟先暫停喺「吸氣中」嗰格，問全班：「而家橫膈膜係向上定向下？」——答完先播落去對答案。
分左右兩組：一組睇住動畫講吸氣、一組講呼氣，互相補漏。
分享連結出做家課：叫學生錄一段 30 秒語音，跟住動畫講一次成個吸氣流程。
🏁 你已經識咗「加層」呢一招
EP1 畫圖、EP2 加動畫——同一幅圖，一層一層加上去，冇寫過一行 code，免費版做到。乜科都用得：地理加板塊移動、物理加電流流動、中文加筆順動畫。
下集大結局 EP3：加埋「血」——藍血流入肺泡、O₂ 入血 CO₂ 出血、藍轉紅，仲會叫 AI 自己輸出一份核對清單畀老師 fact-check。